Гректии-римнии тустааччыларбыт ситиһиилэрэ

   Тульскай уобалас Узловая куоратыгар 2004-2005 сс. төрөөбүт уолаттарга Советскай Союз Геройа С.М. Смоленскай кэриэһигэр гректии-римнии тустууга Бүтүн Россиятааҕы турнирга Андрей Слепцов 110 киилэҕэ иккис миэстэни ылла.

   Манна даҕатан эттэххэ, Андрей Үөһээ Дьааҥы улууһун ыччата, билигин Р.М. Дмитриев аатынан республикатааҕы Олимпийскай эрэл училищетын иккис курсун студена.

   Бу түгэнинэн туһанан тренер Матвей Матвеев – Саха Республикатын спортивнай тустууга федерациятын вице-президенэ Дмитрий Румович Ушницкайга, Үөһээ Дьааҥы улууһун дьаһалтатыгар (баһылык Гаврил Ильич Чириков), Андрей аймаҕа Варвара Николаевна Погодаеваҕа, индивидуальнай предприниматель Саина Витальевна Матвееваҕа – күүс-көмө, өйөбүл буолбуттарын иһин барҕа махталын тиэрдэр.

  Манна сыһыары тутан иһитиннэрдэххэ, эмиэ бу күннэргэ Амурдааҕы Комсомольскай куоракка буолан ааспыт Дальнай Восток федеральнай уокуругун эр дьоҥҥо гректии-римнии тустууга чемпионатыгар биһиги бөҕөстөрбүт эриэ-дэхси ситиһиилэннилэр. Ол курдук, Иван Шамаев (55 кг), Христофор Потапов (67 кг) чемпионнаатылар, Александр Гурьев (55 кг), Дмитрий Григорьев (63 кг), Владислав Павлов (72 кг) үрүҥ көмүс, оттон Ньургун Макаров (60 кг) боруонса мэтээл хаһаайыннарынан буоллулар.

  Ахсынньы 1-8 күннэригэр Алушта куоракка гректии-римнии тустууга Россия эдэрдэргэ сүүмэрдэммит хамаандатын үөрэтэр-эрчийэр түмсүүтэ ыытыллар. Онно РФ спортивнай тустууга федерациятын президенин ыҥырыытынан Саха сириттэн спортсменнар: Р.Степанов, Андрей Слепцов, Ф.Устинов, С.Стручков уонна тренер Матвей Матвеевич Матвеев ыҥырылыннылар.

«Дьулурҕан».

Хаартыскаҕа: пъедестал иккис үктэлигэр — эдэр талааннаах тустуук Андрей Слепцов.