2006-2007 сс.т. уолаттарга Тарскай быйылгы чемпионата ыйааһыннар аайы тыҥааһыннаах, сытыы утарсыылардаах ааста. Кум-хам тутуһан, дэбигис хотуһуу суох. Тустууктар быһыылара-таһаалара, сылбырҕа хамсаныылара, албастары ыраастык оҥороллоро, сыыһаны-халтыны мүччү туппакка тыастаахтык бырахсаллара, сылайбаттара, көрөөччүлэри астыннарда. Ону пандемия хааччаҕа бүтэн, тустуунан дьарыктанааччылар элбээбиттэрэ, маассабас үрдээбитэ көрдөрөр диэн тренердэр быһаараллар. Тэрээһин, бэлэмнэнии да үлэлэр ону эмиэ көрдөрөллөр. Ааспыт сайын Владивостокка “Азия оҕолорун” оонньууларыгар тустан мэтээллэри ылаттаабыт Эрхан Куличкин, Алексей Захаров, Адам Николаев курдук уопутурбут уолаттар кыайыылары ситиспиттэрэ эмиэ үөртэ. Күрэхтэһии бүтэһик хапсыһыыларыгар диэри ханнык хамаанда бастыыра биллибэт, эгил-тэгил очко аахсыылардаах киирсиилэр буоллулар. Ордук, Дьокуускай, Чурапчы, Уус-Алдан улуустарын хамаандалара улаханнык хатыстылар.
Түмүккэ, 12 кыттааччылаах 42 кг Эрхаан Куличкин (Дьокуускай), Никита Элясов (Чурапчы), Арылхан Колтогоров (Сунтаар), Сайдам Федоров (Чурапчы); 14 кытт. 45кг Уйусхан Халгаев (Чурапчы), Анатолий Николаев (Чурапчы), Эльдар Аввакумов (Уус-Алдан), Эрнест Яковлев (Сунтаар);
30 кытт. 48 кг Роман Кириллин (Сунтаар), Михаил Осипов (Ньурба), Айхал Харбаев (Дьокуускай), Денис Игнатьев (Сунтаар); 27 кытт. 51 кг Сэмэн Сивцев (Уус-Алдан), Алексей Фокинов (Сунтаар), Иосиф Никонов (Чурапчы), Дима Федоров (Сунтаар); 47 кытт. 55 кг Максим Григорьев (Уус-Алдан), Витя Иванов (Сунтаар), Анатолий Иванов (Чурапчы), Юрий Винокуров (Дьокуускай);
33 кытт. 60 кг Константин Слепцов (Мэҥэ-Хаҥалас), Айкар Марков (Мэҥэ-Хаҥалас), Влад Ноговицын (Сунтаар), Анатолий Яковлев (Чурапчы); 29 кытт. 65 кг Борис Иринеев (Дьокуускай), Сергей Петухов (Уус-Алдан), Денис Федоров (Дьокуускай), Давид Руфов (Уус-Алдан); 18 кытт. 71 кг Ариан Оконешников (Чурапчы), Алексей Захаров (Горнай), Давид Чириков (Сунтаар), Дмитрий Павлов (Дьокуускай); 11 кытт. 80 кг Адам Николаев (Ньурба), Артем Афанасьев (Дьокуускай), Андрей Охлопков (Нам), Тулуйхан Никитин (Чурапчы);
10 кытт. 92 кгВладимир Басов (Чурапчы), Жаксылык Асамов (Дьокуускай), Степан Иванов (Ньурба), Данил Соболев (Дьокуускай); 8 кытт. 110 кг Марат Темербаев (Дьокуускай), Василий Охлопков (Томпо), Арчылан Никифоров (Хаҥалас), Михаил Николаев (Ньурба) – бастакы, иккис, үһүс миэстэлэри ылаттаатылар.
Р.М. Дмитриев аатынан Олимпийскай эрэл училищетыгар үөрэнэр Ньурба ыччата Адам Николаев: «Син үөрдүм, бастыахтаахпын билэр этим. Эрэллээхтик бастаатым. Утарсааччыларбар биир да баалы биэрбэтим. Онон баар кыахпынан туһуннум, сыалбын-сорукпун толордум. Билигин Степан Петрович Сивцевкэ эрчиллэбин. Дьарыктанарга усулуобуйа толору баар. Бу күннэргэ Дальнай Восток чемпионатыгар кыттыам, онтон Россия финалыгар кыттан миэстэлэспит киһи диэн санаалаахпын».
Хаамаанданан түмүккэ, Дьокуускай бастаата (тр. Н.Г. Яковлев, С.Е. Афанасьев, В.А. Кривошапкин, П.С. Иванов, А.А. Захаров, Г.Н. Дьяконов, А.П. Осипов, Е.И. Черкашин), Чурапчы иккис (тр. Ю.В. Афанасьев, А.Г. Макаров, И.М. Сысолятин, И.И. Посельскай, И.С. Петров, В.В. Корякин, Д.Ф. Иванов, А.Е. Аржаков, А.С. Демянюк), Сунтаар (тр. Н.Р. Данилов, С.Э. Горохов, С.Н. Семенов, В.О. Яковлев, А.А. Львов, П.Н. Сидоров) үһүс миэстэлэри ылаттаатылар.
Өрөспүүбүлүкэ көҥүл тустууга Федерациятын 1-кы вице-президенэ Виктор Лебедев уонна “Биир ньыгыл Россия” партия салайааччыта Петр Черкашин бириистээх миэстэлэргэ тиксибит тустуук уолаттарга, чөмпүйүөннэр тренердэригэр, бастаабыт хамаандаҕа 50 тыһ.солк, бириистээх миэстэлэргэ тиксибиттэргэ туһааннааҕынан, 30 уонна 20 тыһ.солк. сертификаттары туттартаатылар, түһүлгэ бастыҥ бөҕөстөрүн ааттарын Владимир Басов (Чурапчы), Константин Слепцов (Мэҥэ-Хаҥалас), “Кыраһыабай хапсыһыы” иһин Роман Кириллин ( Сунтаар) уонна Михаил Осипов (Ньурба), “Кыайыыга дьулуурун иһин” Семен Сивцев (Уус-Алдан), “Бастыҥ бөҕөс” Сергей Петухов (Уус-Алдан) анал бириистэринэн биһирэннилэр. Кыайыылаахтарга наҕараадалары Саха Өрөспүүбүлүкэтин физическэй культураҕа уонна спорка миниистирэ Леонид Спиридонов, тустуу Федерациятын толорооччу дириэктэрэ Владимир Карпенко, спорка солбугу бэлэмниир Өрөспүүбүлүкэ киинин дириэктэрин э.т. Михаил Варламов, Р.М. Дмитриев аатынан Олимпийскай эрэл училище дириэктэрин солбуйааччы Александр Контоев туттартаатылар.
Быйылгы Н.Н. Тарскай уолаттарга чемпионатын сүрүн сыала-соруга: Дальнай Восток чемпионатыгар бастыҥнартан хамаанда сүүмэрдэнэн, Саха сирин чиэһин көмүскээһин, онтон салгыы, Россия финалыгар тиийэн кыттыы. Ол инниттэн, улахан түмсүүнү, кичэллээх бэлэмнэниини өссө төгүл сүүмэрдээһини ааһыахтара. Кулун тутарга буолар Россия көбүөрүгэр үс иһигэр киирбиттэр дойду сүүмэрдэммит хамаандатыгар киллэриллиэхтээхтэр уонна сыл устата Саҥа Дьылга диэри норуоттар икки ардыларынааҕы турнирдарга, итиэннэ, бүтүн Россиятааҕы күрэхтэһиилэргэ кыттыахтара, маастарыстыбаларын үрдэтиэхтэрэ. Бу туһунан, өрөспүүбүлүкэ 16-гар диэри саастаах уолаттарга сүрүн тренер Кузьма Сивцев иһитиннэрдэ. 17-18 саастаах уолаттарга өрөспүүбүлүкэ сүрүн тренерэ, Саха Өрөспүүбүлүкэтин үтүөлээх тренерэ Степан Сивцев иһитиннэрдилэр.
Баһылай Посельскай