Сыл уон бастыҥнара
Бастакы нүөмэрдээх лауреатынан Европа көҥүл тустууга чөмпүйүөнэ, тренер Александр Софроновка эрчиллэр Амма ыччата, норуоттар икки ардыларынааҕы кылаастаах спорт маастара Владимир Егоров буолла. Биллэрин курдук, Владимир Егоров Олимпийскай оонньууларга тиийэр сыаллаах-соруктаах, аан дойдутааҕы улахан түһүлгэлэргэ Македония судаарыстыбатын аатыттан ситиһиилээхтик тустар. Санаатын кытта маннык үллэһиинэ:
- “Сыл үчүгэйдик ааста. Ситиһии да, үөрүү да баар. Дьиэ-кэргэммититигэр эбилиннибит – кыыстанныбыт. Онон, ааһан эрэр сылы дьолу-соргуну аҕалбыт сылынан ааҕабын. Саҥа Дьыл кэнниттэн тута, Европа чемпионатыгар бэлэмнэниибит саҕаланыаҕа. Германияҕа “Бундеслига” хамаанданан күрэхтэһиитигэр кыттыаҕым. Дагестанынан, Хасавюртунан, үрдүк хайаларынан сбордарга барыылар күүтэллэр. Ситиһии кэлэрэ барыта бэйэҕиттэн, бэйэ кыаҕар итэҕэйииттэн тутулуктаах дии саныыбын. Сырыыбар-айаммар, бэлэмнэниилэрбэр Сахам сирэ, биир дойдулаахтарым көмөлөһөллөр. Махталым улахан. Сыалым-соругум диэн, биллэн турар, Олимпийскай оонньууларга кыттыы. Олимпиада чугаһаата. Үчүгэйдик үлэлээтэххэ көрөдрүү кэлиэ диэммин эрэнэбин уонна эрэннэрэбин. Саха сирин олохтоохторун, спортсменнары кэлэн иһэр Саха Дьылынан эҕэрдэлиибин, олоххутугар, үлэҕитигэр ситиһиилэри, дьоллоох буолууну баҕарабын!
Дьокуускайтан дзюдоҕа Россия чөмпүйүөҥкэтэ Карина Ефимова, мас тардыһыы түһүлгэлэригэр биир да хотторуута суох, аан дойду чөмпүйүөнэ Семен Ануфриев (Уус-Алдан); боксаҕа Россия чөмпүйүөнүнэн буолары ситиспит Василий Егоров (Мэҥэ-Хаҥалас); самбоҕа Европа чөмпүйүөнэ Валерий Ергалов (Дьокуускай); уһун сиргэ сүүрүүлэргэ Россия чөмпүйүөҥкэтэ уонна үрүҥ көмүс призера Наталья Леонтьева (Сунтаар); Дьокуускай спортсменнара — классическай оҕунан ытыыга Бүтүн Россиятааҕы күүстээх спортсменнар Спартакиадаларын чөмпүйүөҥкэтэ Рената Гаврильева, дуобакка Россия чөмпүйүөнэ Николай Стручков; кикбоксиҥҥа Россия чөмпүйүөнэ Михаил Иванов уонна спортиҥҥа Россия чөмпүйүөнэ Айаал Макаров үрдүк наҕараадаларын туттулар.
Адаптивнай спорт бастыҥнара
Доруобуйаларыгар хааччахтаах адаптивнай спорт бастыҥнарынан харбааһыҥҥа Россия уонна норуоттар икки ардыларынааҕы турнирдар чөмпүйүөҥкэтэ Анастасия Диодорова; дьаадыраны анньыыга уонна копьену быраҕыыга Россия чөмпүйүөнэ Айаал Сивцев; дьаадыраны анньыыга уонна диискэни быраҕыыга Россия чөмпүйүөҥкэтэ Василина Иванова; дуобакка Европа уонна Россия чөмпүйүөнэ, аан дойду призера Александр Ефимов; блочнай оҕунан ытыыга Россия чөмпүйүөнэ Виктор Скрыбыкин; дьаадыраны анньыыга уонна диискэни быраҕыыга паралимпиецтэр сайыҥҥы оонньууларын уонна Бүтүн Россиятааҕы күрэхтэһиилэр чөмпүйүөҥкэтэ Виктория Петрова; тхэквондоҕа паралимпиецтэр сайыҥҥы оонньууларын призера, Россия боруонса призера Татьяна Белова; буулдьанан ытыыга Европа уонна Россия чөмпүйүөҥкэтэ Мария Егорова; дьаадыраны анньыыга уонна диискэни быраҕыыга Россия чөмпүйүөнэ Яков Максимов; пауэрлифтиҥҥэ Россия чөмпүйүөнэ, армрестлиҥҥэ Россия боруонса призера Сергей Безносов адаптивнай спорт уон бастыҥнарын кэккэлэригэр киирдилэр.
Д.П. Коркин бириэмийэтин лауреата
Саха норуотун тапталлаах ырыаһыта, бэйэтин кэмин чаҕылхай спортсмена, спорт тэрийээччитэ, салайааччыта Аркадий Михайлович Алексеев физическэй культура уонна спорт эйгэтин чулууларыгар туттарыллар Саха АССР, РСФСР уонна ССРС үтүөлээх тренерэ Д.П. Коркин аатынан государственнай бириэмийэ лауреатынан буолла уонна номоххо киирбит спортсмен уонна салайааччы быһыытынан үөрүүтүн кытта үллэһиннэ:
- Саамай үөрүүлээх күнүм буолла. Спорт эйгэтигэр улахан наҕараадам суоҕа. Үлэлээбит үлэбин сыаналаатылар диэммин наһаа үөрдүм. Наар культура өттүгэр охтон хааламмын, дьоҥҥо-сэргэҕэ үксүн наар ырыаһыт, музыкан курдук буолан хааллым гынан бараммын, дьиҥинэн, анал үөрэхтээх физкультура уонна спорт специалиһабын, спорка холонон, күрэхтэһэ сылдьыбытым. Сүрдээх кыахтаах өрөспүүбүлүкэ “Урожайын” 1980-87 сылларга таһаарыылаахтык салайбытым, Россия Знамятын ыла сылдьыбыппыт. Уопут атастаһыытыгар Украинанан эҥин сылдьар этибит. Манчаары Спартакиадаларын, Спортивнай оонньуулары, тыа сирин спортивнай оонньууларын ыыталыырбыт. Роман Дмитриев турнирын Эдьигээнтэн Дьокуускайга аҕалбытым. Оччолорго улахан спортивнай база суох этэ гынан баран, маассабас улахан этэ. Билигин хайыһар спорда сөрө тутуллан сайдыан наада. Компьютер үйэтэ кэлэн, олоруу элбээтэ. Хамсанан, эти-сиини хайаан да эрчийиллиэхтээх. Физкультура уонна спорт тус-туһунан хайысхалар буолалларын бэлиэтиэм этэ. Дьиҥинэн, спорт диэн улахан наука буолар, ол сайдыан наада. Бил игин сир аайы тутуулар, стадионнар бөҕө. Бэһи кэммитигэр көрүдүөргэ уонна таһырдьа дьарыктанарбыт. Заалларбыт суохтара. Ол гынан баран, биһи дьулуурдаах этибит. Билигин профессиональнай спорка охтуу буолла. 85 сааспынан үчүгэй бэлиэтээһин буолла. Билигин усулуобуйа тупсан, дьон үйэтэ уһаата. Баар-суох киһибит, Аҕа Баһылыкпыт Айсен Николаев кэлэр сылы Үлэ Сылынан анаата, онон, бу сайдыылаах үйэбитигэр үлэлээн-хамсаан киһи үчүгэйдик олоруон сөп дии саныыбын. Өйү-санааны тутан, түмсүүлээх буолан, сайдыы суолугар турунуохтаахпыт. Кэлэн иһэр Саҥа Дьылга сахам дьонугар, барыгытыгар, үтүө доруобуйаны, саҥа интэриэһинэй сонуннары, саҥа киириилэри, саҥа арыйыылары, үчүгэй доруобуйаны баҕарабын! Инники диэки хардыылыаҕыҥ диэммин ыҥырабын!
Физическэй культураҕа уонна спорка киллэрбит кылааттарын иһин
Буулдьанан ытыы тренерэ Анатолий Мыреев, өрөспүүбүлүкэ физическэй культураҕа уонна маассабай спорка управлениетын начальнига Роман Оконешников Саха сирин физическэй культураҕа уонна спорка үтүөлээх үлэһиттэрин үрдүк ааттарын ыллылар. Е.А. Габышев аатынан Уус-Алдан спортоскуолатын чэпчэки атлетикаҕа тренерэ Серафим Татринов, олимпийскай солбук боксаҕа оскуолатын тренерэ Николай Егоров “Саха Өрөспүүбүлүкэтин үтүөлээх тренерэ” үрдүк аат бэлиэлэрин туттулар. Дьокуускай куорат 6 № спортоскуолатын дириэктэрэ Константин Эйзнер “Гражданскай килбиэн” бэлиэнэн наҕараадаланна. Бүлүү оройуонун физическэй культураҕа уонна спорка управлениетын начальнига Гаврил Евсеев уонна Намнааҕы олимпийскай эрэл оҕо спортоскуолатын дуобакка дириэктэрэ Василий Куприянов РФ спорка миниистирин Махтал Суругун ыллылар.
Общественнай хамсааһын бастыҥнара
Дьокуускай куорат физическэй культураҕа уонна спорка управлениетын начальнига Эдуард Ефимов, Муома улууһун дьаһалтатыгар, Алданнааҕы олимпийскай эрэл оҕо спортоскуолатын дириэктэрэ Максим Скупой, Чурапчы улууһун Хадаарын нэһилиэгин сайдыытын киинэ 100-түү тыһыынча солкуобайдаах сертификаттарынан наҕараадаланнылар.
Физкультура уонна спорт эйгэтин номинацияларын лауреаттарыгар наҕараадалары Ил Түмэн физическэй культураҕа уонна спорка сис кэмитиэтин бэрэссэдээтэлэ Михаил Гуляев,
“Спорка сулууспалааһын” – чэпчэки атлетикаҕа өрөспүүбүлүкэ элбэх төгүллээх чөмпүйүөҥкэтэ, “Саха Өрөспүүбүлүкэ спортсменнарын Союһун” бэрэссэдээьэлин солбуйааччы Галина Сырмолотова; “Сыл бастыҥ тренерэ”- дзюдоҕо өрөспүүбүлүкэ сүүмэрдэммит хамаандатын сүрүн тренерэ Дамдиндорж Гомбодорж; “Бастыҥ судьуйа”- Бороҕоҥҥо Саха сирин норуоттарын VIII Спортивнай оонньууларын сүрүн судьуйата Николай Цыпандин; “Бастыҥ улуус” Алексей Федотов баһылыктаах Уус-Алдан улууһа; “Бастыҥ спортивнай общественнай тэрилтэ”- Ольга Григорьева президеннээх өрөспүүбүлүкэ остуол оонньууларыгар Федерация; Бастыҥ общественнай спорду тэрийээччи”- спорт ветерана Тихон Карамзин; “Бастыҥ спорду ырытааччы”- “Спорт Якутии” сайт-ситимин сүрүн редактора Александр Посельскай; “Сыл мецената”- “Стройград” эргиэн киинин дириэктэрэ Петр Алексеев; “ГТО бастыҥ тэрийээччитэ”- Бүлүү куоратын физическэй культураҕа уонна спорка управлениетын начальнига Степан Федоров номинацияларын спорт лауреаттарынан буоллулар.
“Сахаада-спорт” Ассоциация лауреаттара
“Бастыҥ атах оонньооччу” – Олоҥхо ыһыаҕын, Бороҕоннооҕу Спортивнай оонньуулар абсолютнай чөмпүйүөнэ Валерия Олесова (Хаҥалас); “Бастыҥ мас тардыһааччы” – аан дойду чөмпүйүөнэ Дмитрий Саввин (Томпо); “Бастыҥ хапсаҕайдьыт” – Саха сирин бары күрэхтэһиилэрин чөмпүйүөнэ Александр Румин (Нам); хотугу многоборьеҕа Россия чөмпүйүөнэ уонна рекордсмена Алексей Созонов (Орто-Халыма); хабылык-хаамыска бастыҥа Владислав Попов (Амма); “Дыгын оонньууларын” абсолютнай чөмпүйүөнэ Алексей Уваровскай (Кэбээйи); гиирэ спордугар Бороҕоннооҕу спортивнай оонньуулар чөмпүйүөнэ, Санкт-Петербурга норуоттар икки ардыларынааҕы турнир кыайыылааҕа Егор Попов (Чурпачы); саха оҕунан ытыыга Россия чөмпүйүөнэ, Кыргызстаҥҥа норуоттар икки ардыларынааҕы турнир кыайыылааҕа Ньургустаана Сидорова (Горнай); ат сүүрдүүтүгэр “Саха Өрөспүүбүлүкэтин Ил Дарханын”, “Саха Өрөспүүбүлүкэтин Бырабыыталыстыбатын бирииһин”, “Дерби бирииһин” кыайыылааҕа жокей Семен Гаврильев (Дьокуускай); “Бастыҥ тренер” – гиирэ спордун тренерэ Василий Дьячковскай; “Бастыҥ судьуйа” – Багдарыын Кэскил Ньургун уола (Төхтүр, Хаҥалас); “Бастыҥ тэрийээччи” – 1 № оҕо спортоскуолатын дириэктэрин солбуйааччы Анжела Сидорова (Дьокуускай); “Сыл мецената” – “НХЗ ГРУПП” ген.дир. Вячеслав Нестеров (Хаҥалас); “Бастыҥ спорду сырдатааччы” – Манчаары аатынан өрөспүүбүлүкэ киинин методиһа Максим Суханов; “Бастыҥ спорт федерацията” – Сунтаар улууһун сахалыы остуол оонньууларын федерацията; “Спорт национальнай көрүҥнэрин сайдыыларыгар кылаатын иһин” – Балаҕаннаах орто оскуолатын физкультураҕа учуутала, гиирэ спордугар элбэх үрдүк көрдөрүүлэрдээх спорт ветерана Сергей Спиридонов (Үөһээ-Бүлүү); “Сыл спонсора” “Анаабыр алмаастара” АО ген.дир. Павел Маринычев; “Бастыҥ оҕо спордун тэрийээччи” – Манчаары аатынан өрөспүүбүлүкэ киинин методиһа Вера Федорова.
2022 сыл “Спорка лауреаттарын Баллара” уус-уран самодеятельность кэнсиэринэн доҕуһуолланан үөрүүлээхтик, бырааһынньыктыы быһыыга-майгыга буолан ааста.
Баһылай Посельскай